သွားတော်လေးဆယ် စွယ်တော်လေးဆူ
18 December 2010
အယ်ဒီတာ ခင်ဗျား
ဆရာတို့မဂ္ဂဇင်းတွင် ဘာသာရေးပြသနာ အဖြေလွှာအခန်း ပါရှိ၍စာရှုသူတို့က မေးနိုင်သည်ဟု သိရသဖြင့် ကျွန်တော့်စိတ်က မရှင်းလင်းသော အချက်တစ်ချက်ကို မေးလိုသဖြင့် ၊စာကို ရေးရပါသည်။
စာများတွင် သွားတော်လေးဆယ်၊ စွယ်တော်လေးချောင်း ဟူ၍ တွေ့ရပါသည်။ ပကတိ လူများတွင် သွား ၃၂ ချောင်း ရှိသော်လည်း မြတ်စွာဘုရားတွင် သွားတော်လေးဆယ်၊ စွယ်တော်လေးချောင်း ရှိ၍ သွားတော် ၄၄ ချောင်းဟု ဆိုပါသည်။
ဆရာတော်တစ်ပါးကို လျှောက်ထားကြည့်ရာ သွားတော်ရော စွယ်တော်ပါမှ ၄၀ သာ ရှိကြောင်း ဆိုပါသည်။ ထိုသွားတော် ၄၀ နှင့် ၄၄ ချောင်း နှစ်မျိုးနှစ်စား ကွဲပြားနေသည်ကို ဆရာတို့၏ မဂ္ဂဇင်း ဘာသာရေးပြသနာ အဖြေလွှာ အခန်းမှ နောင်လာနောက်သား ဗုဒ္ဓဘာသာဝင်အများတို့ ကွဲကွဲပြားပြား သိရှိနိုင်ရန် ဖြေရှင်းဖော်ပြပေးစေလိုပါသည် ခင်ဗျား။
ဦးသာဒင်၊ မုံရွာမြို့
သွားတော်လေးဆယ် စွယ်တော်လေးဆူ ၊ပြသနာမှာ ယခုမှ ပေါ်ပေါက်လာသော ပြသနာ မဟုတ်။ ကုန်းဘောင်ခေတ် ပဒုံမင်း ခေါ် ဘိုးတော်မင်းတရား (၁၁၄၃-၁၁၈၂) လက်ထက်တွင်လည်း အကြီးအကျယ် အငြင်းအခုံဖြစ်၍ ဆရာတော် သံဃာတော်များပင် အကွဲကွဲအလွဲလွဲ ဖြစ်သည် ဆိုကြ၏။
ထိုပြသနာကို မောင်းထောင်သာသနာပိုင်လူထွက် မင်းတိုင်ပင် အမတ်ကြီး မဟာဓမ္မသင်္ကြန် ဖြေဆိုခဲ့ရကြောင်း သာသနာလင်္ကာရစာတမ်းတွင် ဆိုပေသည်။
သွားတော် ၄၀နှင့် စွယ်တော် ၄ ချောင်းသည် အချို့ ဆရာတော်တို့က သီးခြား ဖြစ်သည်။ အချို့ ဆရာတော်တို့က စွယ်တော်သည် သွားတော်တွင် အပါအ၀င် ဖြစ်သည်ဟု ဆိုကြ၏။
ဆရာတော်များ စကားမညီညွတ်ရှိ၍ ထိုအခါ အသက် ၇၈ နှစ်အရွယ် မင်းတိုင်ပင်အမတ်ကြီးအား ဘုရင်မင်းမြတ်က မေးတော်မူ၍ ကျမ်းဂန်အထောက်အထားဖြင့် အဆုံးအဖြတ်ရေးရလေသည်။ အမတ်ကြီးက မဟာအဋ္ဌကထာ၊ ၀ိသုဒ္ဓိ၊မဂ် အဋ္ဌကထာ စသည်ကိုဆောင်၍ တင်လျှောက်ရသည်။
အညေသံ ပရိဏ္ဏဒန္တာနမ္ပိ ဒွတ္တိံသဒန္တာ ဟောန္တိ၊ ဣမဿ ပနစတ္တာလီသံ ဘ၀ဿန္တိ။
-မြတ်စွာဘုရားအလောင်းမှ အခြားတစ်ပါးကုန် သော သူတို့အားလည်း၊ ဒွတ္တိံသဒန္တာ ၃၂ ချောင်းသောသွားတို့သည်၊ ဟောန္တိ- ဖြစ်ကုန်၏။ ၊ဣမဿ ပန-ဤဘုရား အလောင်းအားကား၊ စတ္တာလီသံ-၄၀ သောသွားတို့သည်၊ ဘ၀ိသန္တိ- ဖြစ်ကုန်လတံ္တ။- ဟု ဘုရားအလောင်း ဖွားတော်မူစကပင် စွယ်တော် လေးဆူ အပါအ၀င် သွားတော် ၄၀ ဖြစ်ကြောင်း သုတ်မဟာဝါ အဋ္ဌကထာက ဖွင့်ဆိုလေသည်။
၎င်းင်းနှင့်ပတ်သက်၍
သွားမည်ကုန်သည်ကား သွားအပြည့်အစုံရှိသော လူသာမန်တို့အား ၃၂ ချောင်းဖြစ်ကုန်၏။ ထို ၃၂ ချောင်းတို့သည် အဆင်းဖြူ၍ ပုံသဏ္ဏန်အားဖြင့်ကား အမျိုးမျိုးရှိကုန်၏။ ထိုသွားတို့တွင် အောက်သွားအစဉ်က အလယ် ၄ ချာင်းတို့သည် ဘူးစေ့သဏ္ဏာန်ရှိ၍ အမြစ် ၁ ခုစီ ရှိကုန်၏။ထို ၄ ချောင်းမှအပ တစ်ဖက် တစ်ချောင်းစီသည် အစွယ်ဖြစ်၍ အမြစ်နှစ်ခွ ရှိကြလေသည်။ထိုအစွယ် ၂ ချောင်း၏ အပြင်ဘက် စွယ်ရံနှစ်ချောင်းကား အမြစ် ၃ ခွရှိသည်ဟု ဆို၏။ထိုစွယ်ရံ ၂ ချောင်း၏အပြင် ၂ ချောင်းစီဖြစ်သော အံလယ် ၄ ချောင်းတို့ကား အမြစ် ၄ ခွ ရှိကြ၏။ ယင်း၏အပြင်ဘက် အံဆုံး ၄ ချောင်းကား အမြစ် ၄ ခွစီ ရှိသည်ဟု ဆိုလေသည်။၊သို့ အလယ် ၄ ချောင်း အစွယ် ၂ ချောင်း ထို့အပြင် စွယ်ရံ ၂ ချောင်း အံလယ် ၄ ချောင်းနှင့် အံဆုံး ၄ ချောင်း ပေါင်းလျှင် အောက်သွား ၁၆ ချောင်း ဖြစ်၍ အထက်သွားဖုံးကလည်း အထက်သွား ၁၆ ချောင်းစီ ရှိသဖြင့် လူတစ်ဦးအဖို့ သွားအစုံအလင် ၃၂ ချောင်း ဖြစ်လေတော့၏။၊ကား ၀ိသုဒိ၊မဂ် အဋ္ဌကထာ၏အဆို ဖြစ်လေသည်။
မြတ်စွာဘုရားမှာကား လူသာမန်တို့ထက် အံသွားအထက် ၄ ချောင်း အောက် ၄ ချောင်း ပို၍ သွားတော် ၄၀ တိတိ ဖြစ်လေသည်။၊ ဖော်ပြချက်တို့မှာ မင်းတိုင်ပင်အမတ်ကြီး မဟာဓမ်္မသင်္ကြန်၏ အဆုံးအဖြတ်မှ အကျဉ်းဖော်ပြချက် ဖြစ် လေသည်။ ယင်းကိုပင် ယောအတွင်းဝန်ကြီး (ယောမင်းကြီး ဦးဘိုးလှိုင်) က ၎င်း၏ ကာယာနုပသနာကျမ်းတွင်၊ ဤသို့အဆုံးအဖြတ် ပြုခဲ့လေသည်။
အရွယ်ရောက်၍ သွားပြည့်စုံလျှင် အထက်တစ်ဆယ့် ခြောက်ချောင်း၊ အောက်တစ်ဆယ့်ခြောက်ချောင်းအားဖြင့် သုံးဆယ့်နှစ်ချောင်း ဖြစ်၏။ ငယ်သွား မလဲသေးသော သူငယ်က ငယ်သွား ပြည့်စုံလျှင် အထက်ဆယ်ချောင်း၊ အောက်ဆယ်ချောင်းဖြင့် အချောင်းနှစ်ဆယ်ဖြစ်၏။ ထိုငယ်သွားသည် ခုနစ်နှစ်မှ တစ်ဆယ့်လေးနှစ် အတွင်းက ကျိုးတတ်၏။ ကျိုးပြီးလျှင် ပေါက်ရန် သွားလည်း ငယ်သွားအောက်အမြစ်ခြေတွင် မုန့်ကျွဲသဲကဲ့သို့ နုနုပျော့ပျော့ အထက်တစ်ဆယ့်လေးချောင်း အောက်တစ်ဆယ့် လေးချောင်းရှိ၏။ ထို့ကြောင့် ငယ်သွား မကျိုးမီ ခြောက်နှစ်ရွယ် သူငယ်က ပေါက်ရန်သွားနှင့်တကွ အောက်နှစ်ဆယ့်လေးချောင်း၊ အထက် နှစ်ဆယ့်လေးချောင်းအားဖြင့် လေးဆယ့်ရှစ်ချောင်းရှိ၏။ ပေါက်ရန် သွားနုတို့သည် ရှေးဦးစွာ အလယ်က မာပြီးမှ အပြင်ကို တဖြည်းဖြည်းမာ၏။ ပေါက်ရန် သွားကြီးသည့် ကာလ ငယ်သွားတို့သည် ကျိုးကြ၊ ကျွတ်ကြကုန်၏။ အထက် တစ်ဆယ့်လေးချောင်း၊ အောက်တစ်ဆယ့်လေးချောင်း ပေါက်ပြီးမှ အထက်အောက် ၀ဲယာအဆုံးဟုခေါ်သော သွား ၄ ချောင်းပေါက်၍ အထက် တစ်ဆယ့်ခြောက်ချောင်း၊ အောက်တစ်ဆယ့်ခြောက်ချောင်းအားဖြင့် သုံးဆယ့်နှစ်ချောင်း ဖြစ်ကုန်၏။
ပေါက်ပြီးသောသွားတို့၏ အမြစ်တို့သည် အထက်အောက် ပါး၊ရိုး၌ သံရိုက်သကဲ့သို့ စိုက်ဝင်လျက်နေ၏။ သွားဖုံးတွင်းကတည်သော အလယ်ပိုင်းသည် သေး၏။ သွားဖုံးပြင်ကရှိသောအပိုင်းသည် ကြီး၏။ သွားတို့သည် အဆင်းအားဖြင့် ဖြူကုန်၏။ သဏ္ဏာန်အားဖြင့် အထူးထူးအပြားပြားရှိကုန်၏။ အထက်အောက် ရှေ့သွား လေးချောင်းစီ ရှစ်ချောင်းတို့သည် အမြစ်တစ်ခုစီသာ ရှိကုန်၏။ မြေစိုင်၌ စီ၍စိုက်ထားသော ဘူးစေ့သဏ္ဏာန် ရှိကုန်၏။ အစွယ်လေးချောင်းတို့သည် အမြစ်တစ်ခုစီ စပယ်ငုံသဏ္ဏာန် ရှိကုန်၏။ အစွယ်တို့၏ ၀ဲယာ အထက် အောက် အံငယ်လေးချောင်းစီ ရှစ်ချောင်းတို့သည် အမြစ်တို့ကို ၀ဲယာ နှစ်ချောင်းစီ ရှိကြကုန်၏။ လှည်းထောက်ခွသဏ္ဏာန်နှင့် တူကြကုန်၏။ အံငယ်တို့ ၀ဲယာ အထက်အောက် သုံးချောင်းစီ၊ အံကြီး တစ်ဆယ့် နှစ်ချောင်းတို့သည် ခိုင်ခံ့သောအမြစ်ကြီး ပြင်ဘက် နှစ်ချောင်း၊ အတွင်း နှစ်ချောင်းအားဖြင့် သုံးချောင်းစီ ရှိကုန်၏။ ဆူးလေသီးသဏ္ဏာန်နှင့် တူကြကုန်၏။ ၊သို့ သွားတို့သည် သဏ္ဏာန်အားဖြင့် လေးမျိုး ရှိကုန်၏။ (ကာယနုပသနာ ၁၂၈)
ဖော်ပြပါတို့မှာ သာမန်လူတို့၏သွား ၃၂ ချောင်း ရှိပုံကို ဖော်ပြ၏။ မြတ်စွာဘုရားတို့အတွက် ယင်း ၃၂ ချောင်းတွင် အထက် အံ ၀ဲယာ ၂ ချောင်းစီ၊ အောက်အံ ၀ဲယာ ၂ ချောင်းစီတို့ကိုယူကာ သွားတော် ၄၀ ကို သိနိုင်ရာ၏။
ပြသနာတွင် သွားတော်လေးဆယ်၊ စွယ်တော်လေးဆူအရ ရှင်းလင်းရန်သာ ဖြစ်သော်လည်း မင်းတိုင်ပင် အမတ်ကြီး မဟာဓမ္မသင်္ကြန် ဖြေဆိုသကဲ့သို့ ပြည့်ပြည့်စုံစုံ ဖြေဆိုလိုက်ရပါသည်။ ထိုနှင့် တစ်ဆက်တည်း ခဏခဏ တောင်းဆိုခြင်းခံရသော ရှေးဆရာတော်ကြီးများ၏ သွားတော်လေးဆယ်ဘုရား ရှိခိုးပါ ထည့်သွင်း ဖော်ပြလိုက်ပါသည်။ သွားဝေဒနာရှင်များ ကျက်မှတ်ရှိခိုးနိုင်ကြပါစေသတည်း။
သတိဂတိ ဓိတိမနံ္တ၊ သနံ္တ ဒနံ္တ သုခါဝဟံ။
စတ္တာလီသ သမဒနံ္တ၊ ဗုဒ္ဓံ၊ ၀န္ဒာမိ အာဒရံ။
သတိဂတိဓိတိမနံ္တ-အလွန်ကြီးမားသောသတိ၊ လောကီသားတို့ စကားတစ်ခွန်း မြန်လွန်းဗုဒ္ဓ၊ နှုတ်တော်မှလျှင် တစ်ရာ့နှစ်ဆယ့်ရှစ်ခွန်း ရည်ညွှန်းစကား မြွက်ကြားတော်မူလျက် သူမတူအောင် တည်ကြည်ခြင်း ရှိတော်မူထသော၊ သနံ္တ-အေးချမ်းတည်ငြိမ် ၊ဣနြေ္ဒ၊လည်း ရှိတော်မူထသော၊ ဒနံ္တ-အယဉ်ကျေးဆုံး ဖက်နှုန်းမရှိ အဓိပတိ သခင် ဖြစ်တော် မူသော၊ သုခါဝဟံ- လူနတ်ဗြဟ္မာ သတ္တ၀ါတို့၏ ချမ်းသာစီးပွားကို ဆောင်တော်မူတတ်သော၊ စတ္တလီသ သမဒနံ္တ စွယ်တော်လေးဆူ ရည်တူပါဝင် အမြင်တင့်တယ် လေးဆယ်သော သွားတော်တို့နှင့် ပြည့်စုံတော်မူသော မြတ်စွာဘုရားသခင် ကိုယ်တော်မြတ်ကြီးကို၊ အဟံ-သွားနာ သွားကိုက် သွား၌ဝေဒနာ ဖြစ်တတ်ပါ၍၊ သံသရာဒုက္ခ နေ့ညများစွာ ခံစားရပါသော ဘုရားတပည့်တော်သည်၊ အာဒရံ-ခြေ လက် နဖူးခ တံတောင် ဒူးဟု ငါးဦးတည်ရင်း ညီညွတ်ခြင်းဖြင့် မယွင်းသေချာ အလွန်ရိုသေစွာ၊ ၀န္ဒာမိ-ဦးညွတ်ရိုကျိုး လက်အုပ်မိုး၍ ရှိခိုးလိုက်ပါ၏ အရှင်ဘုရား။
မြတ်သတိဝါဒီ မဂ္ဂဇင်း၊
ဇန်န၀ါရီလ၊ ၂၀၀၁ ခုနှစ်
No comments:
Post a Comment